Di Kitabê Muhemmedê Şêx Ensarî: “RARO RAŞT” Û “MEʿLÛMATÊ DÎNÎYE - (Metn û Cigêrayîş)

Na xebate kitabanê Raro Raşt û Meʿlûmatê Dînîye yê Muhemmedê Şêx Ensarî ser o ya. Nê eserê menzûmî serra 1947-1948 de nusîyayê. Raro Raşt derheqê eqîde de, Meʿlûmatê Dînîye zî derheqê fiqihî de nusîyayo. Hetê kronolojîkî ra, kirdkî (zazakî) de kitabê hîrêyin ê; la wareyanê xo de kitabê yewin ê ke bi kirdkî nusîyayê. Nê kitabî hetanî ewro tena destnuşteyan de, bi hawayêko mehdûd mendê, cora bêxeyja çend kesan xebera kesî înan ra çin bî. Bi na xebate reya verêne nê kitabî dîyenê şinasnayene û ser o tehlîlo edebî virazîyeno. Na xebate çar beşan ra yena pê. Beşê yewinî de; kurdkî de û ziwananê bînan de eseranê eqaîd û fiqihîyanê menzûman ra behs beno. Beşê dîyinî de heyatê Muhemmedê Şêx Ensarî ra behs beno û eserê ey dîyenê şinasnayene. Beşê hîrêyinî de hetê şekilî û huneranê edebî ra metnê kitaban tehlîl beno. Beşê çarinî de zî metne kitaban bi ûsulê tenqîdî transkrîbe bîyê.