Gula Mîrza

Tevahî nevîçirrkên Ehrîman li vî welatê pîroz, welatê agir û rojê berhev bûbûn. Ev erdnîgarî warê ronahî û heqîqetê bû. Tovê mirovayiyê li vê axê hatibû çandin û destpêka mirovahîyê li vir dest pê kiribû. Wek hûnandina tevnekê hemû nirx, yek bi yek li vî welatî hatin afirandin. Çirûska yekem li vê derê çirisî. Yekem çandin, kedîkirina ajalan, huner, çand, wêje, perwerde, ziman û ol li vê xakê dest pê kir. Yezdan, nêrîna xwe ya yekem li ser vê herêmê ve pekand. Herdu robarên yekem li vê derê der bûn. Hespê yekem, li ser vê zemînê bazdana xwe ya yekem kir. Peywa yekem li ser vî kişwerî dest pê kir û pêxemberê yekem, yekem danezana xwe li ser vê axê anî ziman. Tim afirîde, ins û cinn û caniwer dizanin ku kok li ku be, cewher jî li wê derê ye. Hemû dewletên cîhane, çiqas qatil, diz, apore bijî û sûtalên wan hebûn, hemû berhev kiribûn û şandibûn welatê agir û rojê. Dixwestin carekê ji van kirêtiyên xwe xilas bibin û wan di aramîyê de bijîn.