Gulcivîn

Gulcivîn – Dîwana Mela Sîraceddînê Xelîlî

Mela Sîraceddînê Xelîlî, di sala 1930î de hatiye dinyayê û di sala 1983yan de çûye ber rehma Xwedê. Ew di demeke de jiyaye ku ji aliyê aborî, siyasî û edebî ve ji bo Kurdan û zimanê Kurdî dewreke pir dijwar bû. Kurdî qedexe bû; gelek kes newêrîbû binivîsin. Yên ku dinivîsandin jî, kitêb û nivîsên xwe vedişartin; jixwe îmkana çapkirinê jî tunebû. Ji ber vê rewşa siyasî, weke gelek kesan, Mela Sîraceddînê Xelîlî jî baş nehatiye naskirin. Xelîlî, wek Cegerxwîn, Seyid Eliyê Findikî û Seydayê Tîrêj — yên ku di vê sedsalê de berhemên hêja nivîsîne — careke din ruh û can daye helbesta klasîk a Kurmancî. Li gorî asta berhemên sedsala xwe, ew dîwaneke serkeftî pêk aniye. Dîwana wî ya bi navê Gulcivîn, yek ji dîwanên girîng û giranbiha yên serdema dawî ya edebiyata klasîk a Kurmancî ye. Zimanê wî xurt û herikbar e, her weha gelekî sivik e ku di roja me de bi hêsanî tê fêhmkirin. Mela Sîraceddînê Xelîlî bi Kurdî, Erebî, Farisî û Tirkî helbest nivîsîne. Dîwana wî ji 143 helbestan pêk hatiye. Naveroka wê, bi taybetî, li ser mijarên civakî û eşqê rawestiye; helbestên dînî jî di nav de pir in. Mela Sîraceddîn, piraniya umrê xwe li herêma Botan û Torê derbas kiriye. Ji ber vê yekê jî, tesîra devoka van her du herêman — bi taybetî ya Torê — li ser ziman û şêwaza wî bi awayekî zelal xuya dike.   Ji bo hemû berhemên Nûbihar Yayınları vir bitikînin Ji bo hemû berhemên Mela Sîraceddînê Xelîlî vir bitikînin