Kovara Vate 16

WENDOXAN RÊ

Wendoxê delalî, 

Hûmara maya ke destê şima de hûmaranê mayê dewlemendan (pêtan) ra yew a. Na hûmare de ma di nuştoxanê kirmanckî (zazakî) danî naskerdene: Şêx Selaheddînê Şêx Seîdî (1910-1978) û Şaîr Mem yani Mela Mehemedê Mela Ebdulxefûrê Hezanî (dayîkerabîyayîş 1939). Nê nuştoxan, Mela Ehmedê Xasî û Usman Efendîyê Babijî dima kitabê hîrêyin û çarinê kirmanckî yê ke neşr bîyê nuştê. Ma na hûmare de nê kitabekan ra Beyatnameyî newe ra neşr kenî ke wendoxî bivînê. Kitabê bînî yanî Eqîdetu’l-Îmanî zî ma hûmara Vateyî ya 17. de neşr kenî. 

Reyna na hûmare de ma şêranê welatî ra Alîşêr (Elîşêr), Zerîfa û Yadoyî hîna nêzdî ra nas kenî. 

Na hûmare de ardimê nuştoxanê -sey W. K. Merdimîn, Roşan Lezgîn, Jêhatî Zengelan û Xezala Şarikî- ke welat ra bi nuşteyanê xo piştî danê ma, dewam keno. 

Keda zaf nuştoxanê ma na hûmara ma de esta. Hêvîya ma a ya ke şima nuşteyanê înan ra tam bigîrê. 

Embazê ke vilakerdişê Vateyî de fedakarîye kenî, moral danê ma. Ma anê wendoxan vîrî ke Vate ewro kitabrotoxanê (kitabçîyanê) Dêrsim, Erzingan, Çewlîg, Dîyarbekir, Xarpêt, Îstanbul û Anqara de zî yeno rotiş. Eke nas û dostê şima nê şaristanan (şehîran) de estê xebere bidî înan. 

Wa para şima zî neşrbîyayîş û vilabîyayîşê Vateyî de bibo ke Vate serra 2002 de hîna xurt bibo. 

Weşîye û şayîye de bimanê.