Kovara Vate 8

WENDOXAN RÊ

Wendoxê delalî, Hamnan (amnan) ame, hûmara heştina Vateyî zî amey. Na hûmara ma tikê (tenê) rew vejiyay; ma wazenê ke hûmaranê nînan zî qe nêbo bê bereykewtiş (hereykewtiş) wextê wo de vejê. Ma hêvî kenê ke wendox, abone û nuştoxê ma zî her yew (jû) hetê xo ra ma rê ardim bikerê ke kovara (dergiya) ma ewro ra pey (tepya) hîna kalîteyine û hîna başan vejîyo. 

Ma verî vatbi û newe ra vanê ke bi mektuban û rexneyanê (krîtîkanê) şima ma keyfweş benê. Mesela na hûmara ma de nuşteyêk wendoxê ma Roşan Lezgînî esto: Boya Welatî. Roşan Dîyarbekir ra rexneyanê xo nuseno. Hem çiyanê raştan hem zî şaşan vano. Bêguman qiseyan (qalan) û nuşteyanê ma zafînî de raştî zî estê- şaşî zî. Çîyo muhîm o yo ke ma bê ku yewbînî bidejnê (bitewne) fikrê xo yewbînan rê vajê û goşdarîya yewbînan bikerê. Eke ma wina (nîya) bikerê, ma do (ko) pîya û hîna asan raştîye bivînê. Sey ê Roşan Lezgînî, mektubê ke welat ra yenê raşta zî boya welatî danê. 

Wazeno welat de bimanê wazeno teberê welatî de, ma rê binusê. Helbet eke şima wazenê ke na kovare bimano û raver (aver) şêro!