Roman û Gotar -Mixaîl Baxtîn û Romana Kurdî

Roman û Gotar -Mixaîl Baxtîn û Romana Kurdî-Umran Aran

Li gorî Tzvetan Todorov, Mîxaîl Baxtîn giringtirîn teorisyenê edebiyatê yê sedsala bîstan e. Her çend edebiyat di navenda xebatên Baxtîn de cih bigire, lê karîgeriya wî li ser temamê zanistên mirovî bûye. Piştî ku bi rêya zanyarên wek Kristeva û Todorov ve Baxtîn li Ewropayê hat nasîn, li derdora navê wî û bi îlhama xebatên wî gelek hizir û teorî hatin avakirin; ewqas ku wî bi xwe tu carî wan texmîn nekiribe. Edebiyat, sînema, perwerde, felsefe, semiyotîk, xebatên çandî, antropolojî, xebatên femînîst û postkolonyal, Marksîzm û teolojî hin ji wan qadên zanistî ne ku karîgeriya Baxtîn li wan xwe nîşan daye. Di teoriya edebî ya Baxtîn de, çemkên pirdengî, heteroglossîa û karnaval cihekî bingehîn digirin. Di vê xebatê de, ev her sê çemk bi berfirehî hatine ravekirin û bi pirdengiyê Mîrnameya Jan Dost, bi heteroglossîayê Saturna Remezan Alan, û bi karnavalê Aporîaya H. Kovan Baqî re, bi xwendineke nêzîk hatine xwendin. Her weha, çar nivîsarên din ên di vê xebatê de cih girtine, dê hem ji bo famkirina teoriya edebî ya Baxtîn û hem jî ji bo dîtina cihê wê di nav teoriya edebî ya bi giştî de alîkar bin.