Bacanên Pelçiqî

A li ser pişta min ne bi tenê jinek bû; “Zagros”ek bû, min çiyayek li ser pişta xwe kiribû û xwe li nav sînoran qelibandibû; ji ber wê, barê min zehf giran bû û pişta min ji ber tewiyabû. A li ser pişta min ne bi tenê jinek bû; barê êş û zext û bindestî û çewisandina dîrokî ya hemû jintiyê bû; ji ber wê, vî barî pişta min xistibû ber min û şikenandibû. A li ser pişta min ne bi tenê jinek bû; şev bû, hevaltî bû, xewn bû, dilsozî bû, bawerî bû, kilam bû, çavekî tenûrî û destekî sêlê bû. A li ser pişta min ne bi tenê jinek bû; hêrsa min, qehra min, tolhildana min û beştê çar-mîxa welatê min bû.