Selahedînê Eyûbî û Kurê Mîrê Amediyê

Selahedînê Eyûbî û Kurê Mîrê Amediyê-Mihemed Seîd Temel

Ev malbata ku ji welatê xwe ji ber zilm û zorê bazdan, lê li welatekî din ji gelê xwe re bûne hêvî û sitar. Navê wan bi tîpên zêrîn li dîroka Kurdistanê nivîsandin; tevî gelek zehmetiyan, jiyana xwe di ber alema Îslamê de derbas kirin.

Ji kesekî re, ew cihê şanazî û rûmetê ye ku dost û neyarên wî, tev li ser wî û dadmendiya wî yek deng bin. Hetanî roja îro, hem dostê Selahedînê Eyyûbî hem neyarên wî li ser wî bi dehan, belkî bi sedan pirtûk û film çêkirine.

Lêbelê, kesek zêde li ser jiyana wî ya şexsî nesekiniye. Ew jî bavek bû, malbateke wî hebû, û Xanima Şemsê di jiyana wî de cihekî zêrîn girtibû. Selahedîn bi destnivîsa xwe dibêje:

"Ez Kurdekî Rewadî me, em di mala xwe de bi Kurdî diaxifîn. Min, bav û apê xwe li karê leşkeriyê bi Tirkî perwerde didît; min li mizgeftê bi zimanê Erebî dixwend."