Di Berhemên Feqîyê Teyran De Tesewwuf

Li ser ziman û berhemên Feqîyê Teyran ku yek ji şairên edebîyata tesewwufê ya Kurdî ye xebatên akademîk pir kêm in. Em dikarin bibêjin ku ji xeynî çend pêşkêşîyên sempozyuman û çend beşên biçûk yên ku di kitêbên di vê dawîyê de hatine çap kirin, tu xebateke ku bi rêk û pêk li ser alîyên wî yên tesewwufî sekinîbe tune ye. Ji ber ku li ser şairekî mîna Feqîyê Teyran ku di edebîyata tesewwufê ya Kurdî de ev qas xwedîyê cihekî muhim e xebateke berfireh nehatîye kirin û alîyên wî yên tesewwufî heta niha bi giştî veşartî mane, me xebateke wiha hewce dît. Di vê çarçoveyê de xebata me ji ber ku di beşa xwe de xwedîyê modelek nîne di bin şertên dijwar de qedîya û di mijara xwe de dibe ku wekî xebateke ewilîn bê hesibandin. Di xebata me de mefhûmên tesewwufî, pêşî di çarçoveya klasîkên tesewwufê de dê bêne terîf kirin û paşê jî li gorî fikr û terîfa Feqîyê Teyran dê bêne vekolîn.